الخميس، 16 أكتوبر 2008

المفاجأة

انا النهارده حبيت افجر المفاجأة اللى انا واعدكم بيها بقالى كتيير
انا لحظت انى في تعليقات كتير من الاخوة المعارضين مرة يقولو انى انا انشاءت البلوج ده علشان اغراض شخصية من الحزب الوطنى الديمقراطي ومرة يقولو انى الحزب هو اللى بيكتبلى اقول ايه ومرة يقولو انى انا في الحزب فابحاول اكسب من ورا البلوج ده حاجه معينة وفي ناس كمان بتقول انى انا عملت البلوج ده علشان احاصر بيه المعارضين وابقى عارف ايه ارائهم وانقلها
المفاجأة
.
.
انا مش في الحزب الوطنى
ولا انضم الى اى حزب
ولكن
انا معتنق ومؤمن بافكار وسياسات واتجاهات الحزب الوطنى وكما قلت في اول بوست كتابته انى فتحت البلوج ده علشان ادافع عن الحزب الوطنى من المعارضين اللى بيعارضو مجرد المعارضة ومش ناوى ادخل الحزب قريباً فالناس اللى بيقولو في مصالح شخصية من ورا البلوج ده يهدوو ويعرفو ان البلوج ده اتعمل علشان ينصف الحزب الذى ظلم كثيرا من ارائكم وتعليقاتكم ، اصلى لحظت ان اى حاجه تحصل في البلد سواء كان غلطه من الشعب اى هيئة معينة اواشخاص معينة بتعلقوها على شماعة الحزب الوطنى فانا اتيت هنا كى اصحح افكاركم المسمومة عن الحزب الوطنى هذا ما حبيت ان اقوله اليوم .......
واخيرا ارجو ان تعزرونى انى مش برد على بعض التعليقات او ما مش بكتب كتير لضيق وقتى هذه الفترة واوعدكم انى سوف ارد على جميع التعليقات قريبا .............
انتظروا البوست الجديد قريب اوووى اوووى

هناك 8 تعليقات:

Lobna Ahmed Nour يقول...

على خلاف الجموع الغفيرة من اخواني واخواتي المدونين والمدونات
انا شايفة ان من حقك تعبر عن رأيك وبلوجر مش حكر على حد دون حد
ومع كده انا شايفة ان التعصب لحزب معين
بشكل اعمى شيء مش كويس ايا كان
واتمنى انك تكون واعي للنقطة دي
وتوزن اراءك بموضوعية

تحياتي

عُمر يقول...

أوك

إن فاكت إنا موش شايفها مفاجأة ولا حاجة

بس عشان خاطرك نخليها مفاجاة يا باشا

بيني وبينك الحزب حاله يصعب عال....... دلوقتي

ربنا يقويك على نصرة الغلابة والمساكين

ومستني يا سيدي بوستك الجامد

بس يلا بقى أوام إنشره أنا مستعجل أوي أوي

عاوزه حاجة تكسر الدنيا

حاجة جامدة

هابي دريمز

أنا حر يقول...

معلش اسمحلي في نقاط سلبية كتير في كلامك بغض النظر عن فكرة المفاجأة
انت بتقول انك مؤمن ومقتنع بفكر الحزب الوطني وده شيء كويس بس اللي مش كويس انك مش في الحزب لان المكان الوحيد اللي بيتم فيه ممارسة السياسة في كل العالم هي الاحزاب السياسية وانت بالرغم من ايمانك واقتناعك بالحزب الا انك مش منضم وده بيوضح ان احنا بنكلم حد عنده ازدواج في الشخصية وعلى فكرة انا مش قصدي التجريح والله بس اي شخص مكاني ممكن يجيله نفس الشعور اللي عندي من كلامك
تاني حاجة بالنسبة لموضوع ابراهيم عيسى اللي انت اتكلمت عليه في البوستين اللي فاتوا ده ملهوش علاقة بافكار الحزب ورؤيته في الاصلاح وايمانك بافكاره لان حرية الصحافة حق يكفله الدستور المصري مش الحزب الوطني ولا رئيس الجمهورية
وماينفعش نعتبر ان مقالات ابراهيم عيسى هي سلوك سيء من سلوكيات الشعب لأن ده هيبقى مش صحيح لان حرية الصحافة بتسمح لاي صحفي كتابة رأيه بكل حرية دون تجاوزات والحقيقة انا مش عايز ارجع للموضوع ده تاني لان بصراحة قصة الاستثمارات اللي هربت دي تموت من الضحك وممكن نضحك بيها على العيال الصغيرة يعني مش نقولها للناس الكبيرة اللي بتفهم
اخر حاجة حابب اقولها هي ان من حقك زي ما قلتلك قبل كده انك تدون وانك تكتب وجهة نظرك اللي انت مؤمن بيها وانك تتواصل مع كل الناس بالصورة اللي انت تحبها لان دي حريتك اللي لازم تتمع بيها والي لازم تعرف انها حق من حقوقك مش حق بيمنحه ليك رئيس الجمهورية
اسف على الاطالة
تحياتي

Empress appy يقول...

هههههههههه
النبى انا مكشوف عني الحجاب وهلبس زعبوط وامسك سبحه واقعد قدام الحسين على راي نواره
بقولك ايه حتى لو معتنق افكاره برضه غلط واحنا عارفين ان الشعب عليه نسب غلط بس لما تبقى الحكومه قافله على نفسه يبقى ايه الحل
ولما يبقى بقى كمان بتقهره يبقى ايه بص لعبتك مش حلوه ومبقتش بتسلينى ومبقاش بنفع اناقشك انا زعلانه كان نفسي تطلع من الحزن اقولك انا هروح اقولهم واناقشهم تيجي

Diyaa' يقول...

يووه :| خضتني يا دلعادي
كل دي مفاجأة
عموماً..وإيه يعني وأتحداك تقري ردي للآخر

علي فكرة
بتكتب عامية وبتختمها ب " سوف "
ثانياً..لاحظت مش أصلي لحظت
ثالثاً..ازاي تقنع وإنت مش مقتنع بشكل عملي ؟! يعني واحد مش مندمج في نشاطات عصابة الأربعين ألف حرامي ..ازاي هيقنعني وهو مش جوه ومش شايف الموقف فعلاً عامل ازاي

رابعاً..الناس بترمي علي الحزن الوطني
بذمتك
وذمة اللي ثقفوك وعلموك وربوك وبنولك شخصية زي الفل طول بعرض بكثافة ..هو في حزن غيره ؟ بمعني
هو المجال السوياسي والأوقتصادي
مفتوحين لحزب غيره ؟! مكشوفة أوي لعبة إن كل حزب جديد يتعمل يطلعوا فيه حد يشقه نصين
ده حاجة
تاني حاجة بقي
بص يا ولد الحلال
شكلك جاي من بلاد الفرنجة
يعني لندن ولا نيويورك ولا أي حاجة من بره..أو يمكن بس متعلم في مصر بس مش مصر ال75 مليون لأ مصر ال4 مليون اللي مش بينطقوا كلمة عربي في الكلاسز
اعذرني في الحصص
عموماً..المقدمة المملة دي بقصد منها إيه
إن ألف باء سياسة..إن تزاوج السلطة بالمال..بداية الإنهيار ولو في بلاد الواك واك..مفيش أي استثناءات..وبقصد التزاوج الواضح مش من تحت لتحت ..أي إدارة بيختلط فيها السلطة بالمال ..والله لو اللي فيها جايين من يوتوبيا علي الفرازة
هيفسدوا
لأنك لما يكون معاك السلطة والمال يبقي كل شئ ليه تمن يا صغيري
بص بقي يا محترم
لما حزبك اللي بتتشدق بالدفاع عنه يبقي كله بزبس مين..وكل وزير يدخل ويعمر في وزارته بيخرج مليونير أو بليونير أو تشيليونير..هو ورزقه
تسمحلي أقولك..هو الوزرا..مش اختيار رئيس الحزن الوطني ؟ طيب هو مش الوزرا..بيدافع عنهم المبجلين رؤساء تحرير الجرايد القومية أبواق دعاية الحزب الوطني..من جيل رجب لحد جيل ممتاز طشة الملوخية ؟! طيب بلاش مش الوزرا نفسهم أعضاء الحزن الوطني والمفروض بيخدموا الشعب مش بيستخدموا الشعب..بيخدموا مصلحة وطن مش بيستخدموا الوطن عشان مصلحتهم !! يبقي بعد كل ده..لما واحد يتنفخ..يطلع نفخته في مين ؟! أكيد في الحزن..معلش لو إحنا شعب صعب وبلد ملعونة ومش نافع فيها أي وسائل علاج أو حتي بتر..لسه اسم الله علي مقامه اللي عياه بيهز البورصة متمسك بإيده وسنانه في الحكم طالما في صدره قلب ينبض
عنه ما نبض بإذن الله
ليه اللي كان بيقول إن الكفن ملوش جيوب ابنه طلع زي عفريت العلبة وبقي معاه 40 و50 مليون دولار وعمل بيهم شركة متعرفش ليها وظيفة غير إنها تخرب البورصة ومش بيتأثر إلا الغلابة

متقنعنيش إن حب البلد بيتغلغل في مسامه وعروقه وأعصابه وفقرات عموده
لأنك لو بتحب وطنك مش هتجيب مدامتك وتصقفوا لفرقة بتلعب كورة في حين إن الألف بني ادم اللي ماتوا جثثهم لسه مش بردت لأن دي مصيبة وإهانة في حق كل مصري إنت بتحكمه..لما يحصل كارثة وأموت فيها والفرجة علي الكورة تكون أهون من متابعة الموقف أو علي الأقل التظاهر بالحداد واحترام الموت مش الصقفة وهز العلم اللعبة علي واحدة وتلت..يبقي أنا كده متشرفش إن رئيس الحزن الوطني ولو كان ملاك يحكمني لأنه مش يهمه ولاد بلده اللي بيموتوا ويهمه ولاد بلده اللي بيستخدمهم في إلهاء الباقيين ..لما بيحصل أي كارثة في اليو إس إيه ..بيجري بوش علي طول ويقطع زياراته ويعملوا حداد وعمرك ما هتلاقيه ماسك علم بيشوح بيه في ماتش أو بيصقف وبينشكح أوي لما لعيب يجيب جون..لأنه بيحب بلده وبيخاف علي أولادها


طيب حاجة كمان بخصوص حزبك الكميل اللطيف الملائكي الذي لا يخطئ وإن اخطأ فبدون تعمد
مش حزبك ده..80% من اعضاء مجالس المحليات من ضمن اعضائه ؟ ضمن منظومته المثالية الرومانسية اليوتوبية الملائكية ؟ ومش أونكل عزمي برضه.جمال بيقوله يا أونكل..مش أونكل عزمي اللي قال إن فساد المحليات بقي للركب ؟ طيب ازاي فساد للركب وحزبك العفيف محتل المحليات ؟ هل لأنهم من كتر العفة مش بيتوقعوا يا عيني وجود موظفين شياطين ملاعين خراسيس تحت إيدهم بيفسدوا في الأرض ويهدموا كل مجهودات مبارك في حب الوطن ؟ ولا من كتر العفة بيسرقوا وبيتحملوا ذنوب الفساد والإفساد عشان يسيبوا أولادهم مستغنيين وبالتالي ما يحتاجوش للسرقة والفساد ؟ فسرلي فساد محليات الحزن الوطني..وأنا أقولك بنهاجمه ليه ..علي أساس إن هجومنا بيفرق أصلاً


أنا طولت أوي ..وطبيعي مش هتقري كل ده بس يمكن تتفرغ وتتكرم وتقري وتقرر متردش زي المرة اللي فاتت
بس بيني وبينك بتبق منك ولا أجدع مبقوق في حواري شبرا
بس حاجة أخيرة
لما القانون يقولك إن الحزب بيتعمل بخمسين توكيل يعني لو نزلت القهوة ساعة ماتش الأهلي والزمالك وقلت الأهلاوي يمضيلي توكيل إنشاء حزب هلاقي 200 امضا عمياني..يعني مش معضلة..لو أيمن نور حب يجيب خمسين توكيل ..مش مصيبة ولا كارثة..وبعدين يقال إن أيمن نور..أذنب الذنب الأكبر وزور توكيلات إنشاء الحزب..ألف باء التحقيقات..فين الدافع ..لما واحد محامي محترم وسياسي مش صغير يزور توكيلات الحزب ودي أسهل حاجة تتعمل ..ويكون تحت إيده ألريدي آلاف التوكيلات ..هيحتاج ليه يزور ؟! فهمني بس ..اشمعني ..طيب بلاش..ليه الشاهد الرئيسي في القضية مات منتحر في سجون حبيب العادلي حامي حمي الحزب الوطني ؟ هل لأن الشاهد الرئيسي ضميره وجعه لأنه وقع المجرم العتيد في شر أعماله لمجرد إنه بس هز رمشه وخد نص مليون صوت في مسرحية انتخابات رئيس الحزب الوطني ؟ ما هي بصراحة ما تتسماش غير كده لأنها كانت وان مان شو
طيب يبقي رئيس الحزب الوحيد اللي حسينا إن عنده جرأة المنافسة يقع بتهمة عويلة وعقيمة ومش منطقية وكمان مشبوهة للإنتحار المزعوم للشاهد الرئيسي..فين بقي الجرئ اللي يقدر يعمل حزب بجد يقول فيه كلمة حق ؟! وبعدين حتي نعمان جمعة ..السياسي القديم وجامعي ورئيس سابق لأعرق حزب مصري متسمعش عنه انت أصلاً..برضه خد الموضوع جد ..هوب قاموا مدخلين عليه صديق رجال الحزب الوطني وعملوا مشاكل جوه الحزب والأمن مش اتدخل إلا بعد ما الطبخة استوت ..وتعالي يا نعمان..خش يا حبيبي جنب أيمن..عرفت حجمك
؟!!
بس أدي الحزب الوطني
اللي بيقرب منه مع السلامة
عايزني بعد كده..أحمل كل العيوب في مصر علي الموظفين الصغيرين والناس الجهلة والمندفعين واللي مش بيعرفوا يغرقوا أو يتحرقوا أو يندفنوا تحت الطوب ؟ ده إنت لو مدمن هيروين أبوك هيتحاسب عليك قبلك يا شيخ لأنه ولي أمرك ومسئول عن تربيتك وعنك لحد سن الرشد..وادمانك مش بيضر غيرك..فما بالك بقي لما فساد موظفينك وشرطتك ووزرائك وإعلامك يضر غيرك..ربنا هيعمل فيك إيه ..وتكون رئيس أكبر شلة منتفعين عرفها تاريخ الشرق الأوسط..ومسميين نفسهم حزب وهما مش مستعدين يتنازلوا عن الأغلبية ولو لمدة 3 شهور لأنهم مش هيعرفوا يرجعوها تاني...بقولك إيه
كفاية عليا كده
حسبي الله ونعم الوكيل في الحزب الوطني
ويكفيني استقالة دكتورة هالة مصطفي من لجنة السياسات ولو متعرفهاش اقري عنها كويس واقري قالت إيه في حزبك الوطني

وبالمناسبة مش شئ لطيف إن مجلس المرأة بيتكلم عن التمثيل السياسي للمرأة وحزبك الوطني الجوكر بتاعه يتجوز عضوة مجلس الشعب وهو مش محتاج الصراحة ويقعدها في البيت ؟! ويمنعها من ممارسة حقها الطبيعي واللي كسبته عن استحقاق وده شئ نادر في أعضاء الحزن الوطني ؟ بذمتك ده حزب أصلاً

عارف..مهما كانت تدوينتك الجديدة..مش هحترمك قبل ما أشوف ردك علي كلامي ورد منطقي ومرتب..وحجة الوقت متنفعش لأنك اللي اتحملت مسئولية إنك تغير رأي الضالين أمثالنا في حزب الملايكة..وبالتالي لو عايز فعلاً..ناقش
وأنا هسيب المذاكرة والله وأقعدلك لو طلعت بتعرف تناقش فعلاً مش بتهرب لعجزك عن الرد

tarek momen يقول...

ده انت حكاية
يعني تاعب نفسك وعامل مدونة وعمال تستحمل تعليقات سخيفة من المدونين
وفي الآخر تطلع مش ابن الحزب
ليه كده هو الحزب ماعترفش بانك ابنه
عموما في دلوقتي اختبار دي ان ايه
وممكن تثبت بنوتك بحكم المحكمة
وبالمناسبة دي اقولك مفاجاة
انا مش مصري انا اصلا من كوالا لامبور و باتكلم عربي مكسر
بس هوايتي اني اتدخل في شئون المصريين

Fantasia يقول...

شوف يا أخ، من حقك تعبر عن وجهة نظرك ومن حقك انك تدافع عن الحزب اللي انت بتؤيد توجهاته.. ونفسي بدل الكلام الفاضي والتهليل والتطبيل ده تدخل في الموضوع وتقولنا قناعاتك دي بنيتها على إيه

لكن مش من حقك ان تقول عن اللي مختلفين معاك ان افكارهم مسمومة

مسمومة ازاي يعني؟

مفيش حد عنده موقف شخصي من الحزب الوطني.. ممكن يا سيدي يكون أعظم حزب في التاريخ وماجابتوش ولادة.. لكن من حقنا اننا ننتقد توجهاته واسلوب ادارته للبلد اللي بتمتد من قبل نظام مبارك

كلمنا كلام منطقي وجد لو عايز الناس تكلمك بجد

bastokka طهقانة يقول...

اصلى لحظت ان اى حاجه تحصل في البلد سواء كان غلطه من الشعب اى هيئة معينة اواشخاص معينة بتعلقوها على شماعة الحزب الوطنى فانا اتيت هنا كى اصحح افكاركم المسمومة
======
و هو مين اللي سممنا يا قطقوط؟ ما اللي سممنا الحزب اللي انت مش ابنه
اقترح تغيير اسم المدونة الى

خمسة فرفشة

اوروفوار