الخميس، 16 أكتوبر 2008

المفاجأة

انا النهارده حبيت افجر المفاجأة اللى انا واعدكم بيها بقالى كتيير
انا لحظت انى في تعليقات كتير من الاخوة المعارضين مرة يقولو انى انا انشاءت البلوج ده علشان اغراض شخصية من الحزب الوطنى الديمقراطي ومرة يقولو انى الحزب هو اللى بيكتبلى اقول ايه ومرة يقولو انى انا في الحزب فابحاول اكسب من ورا البلوج ده حاجه معينة وفي ناس كمان بتقول انى انا عملت البلوج ده علشان احاصر بيه المعارضين وابقى عارف ايه ارائهم وانقلها
المفاجأة
.
.
انا مش في الحزب الوطنى
ولا انضم الى اى حزب
ولكن
انا معتنق ومؤمن بافكار وسياسات واتجاهات الحزب الوطنى وكما قلت في اول بوست كتابته انى فتحت البلوج ده علشان ادافع عن الحزب الوطنى من المعارضين اللى بيعارضو مجرد المعارضة ومش ناوى ادخل الحزب قريباً فالناس اللى بيقولو في مصالح شخصية من ورا البلوج ده يهدوو ويعرفو ان البلوج ده اتعمل علشان ينصف الحزب الذى ظلم كثيرا من ارائكم وتعليقاتكم ، اصلى لحظت ان اى حاجه تحصل في البلد سواء كان غلطه من الشعب اى هيئة معينة اواشخاص معينة بتعلقوها على شماعة الحزب الوطنى فانا اتيت هنا كى اصحح افكاركم المسمومة عن الحزب الوطنى هذا ما حبيت ان اقوله اليوم .......
واخيرا ارجو ان تعزرونى انى مش برد على بعض التعليقات او ما مش بكتب كتير لضيق وقتى هذه الفترة واوعدكم انى سوف ارد على جميع التعليقات قريبا .............
انتظروا البوست الجديد قريب اوووى اوووى

الأربعاء، 8 أكتوبر 2008

مبروك العفو

انا مش عارف اقول ايه ، هو في كرم اكتر من كده يعنى ابراهيم يغلط في حق الريس ويقول عليه اخبار غير موكدة ويفترض ان سوزان عايزه تمسك جمال الحكم وابراهيم عيسى بمقالته دى اثر على اقتصاد مصر بطريقة سيئة وعمل بلبله داخل البلاد وبعد ما القضاء يحكم بالسجن لابراهيم ......................................
فياتى السيد رئيس الجمهورية محمد حسنى مبارك بكل تسامح وعفو كما تعودنا عليه .....يدخل الفرحه في قلوب جميع الصحفين والادباء والكتاب ويعفو عن ابنه ابراهيم عيسى ليضرب مثل في التسامح ويحرج جميع من يسول لهم انفسهم ان يكتبو ما ليس لو اساس من الصحة او يكتبو معلومات خاطئة ...............................
السيد الرئيس عندما قال ان هناك حرية صحافة وديمقراطية وانه لن يدخل في عهده صحفي السجن قال ذلك وهو يعتقد ان جميع ابناءه من الصحفيين يفهمون جيدا معنى حرية الصحافةولكن بعض الشخصيات تستغل هذه الحريات بطريقة خاطئة غرضها الانتشار واغراض اخرى ..........
ان كل صحفى الحق في كتابة مايحلو له ولكن لتطبق ديمقراطية وحرية صحافة صحيحة يجب ان يكون هناك سياجاً يحمى هذة الحريات وهذا ما يفعله السيد الرئيس ....................
وفي النهائة احب ان ابارك لابراهيم عيسى بمناسبة العفو عنه


""والكاظمين الغيظ والعافين عن الناس والله يحب المحسنين ""

السبت، 4 أكتوبر 2008

ابراهيم عيسي 1

طبعا كلنا عارفيين ان ابراهيم عيسي اتحكم عليه بشهريين سجن في القضيه بتاعت صحة الريس و طبعا كلكم بتـقولوا منيين الريس قال ان في حريه في التعبير و ان مافيش صحفي هيتحبس في عهدو.........



كل ده كلام جميل لكن ...............

ده الرئيس محمد حسني مبارك" رئيس جمهوريه مصر العربيه " يعني مينفعش اطلاقا اي حد يقول اي حاجه عليه كده من غير متكون معلومات صحيحه و مؤكده .....


ما انتو طول عمركو بتكتبو و ابراهيم طول عمرو بيكتب و الريس سايبو بس لما تكون الاخبار دي تمس ذاته يجب في هذه اللحظه وقفه و تفكييير ... هو من حق اي انسان ان يكتب اي معلومات "غير مؤكده" عن اي انسان اخر؟؟؟؟ ....


بأمانه تامه لو انت فتحت الجرايد الصبح و وجدت اخبار عنك اخبار "غير مؤكده" هتعمل ايه؟؟؟؟؟؟؟


طبعا حتروووح تخرب بيييت امو و ترفع عليه قضيه تعويض لمجرد الاضرار النفسيه و الاجتماعيه التي لحقت بيك صح ؟؟؟؟


فمابالك برئيس دولتك..... مفكرتوش اخبار زي دي ممكن تأذي وطنك اللي بتحبو اد ايه .... مفكرتش اقتصاد بلدك ممكن يحصلو ايه .... سياسه بلدك..... امن بلدك الداخلي و الخارجي .... ولا انتو تكتبو اي حاجه تسمعوها و خلاص ..... الخبر ده اثر في مصر جامد اوي ... اقتصاديا و اجتماعيا و سياسيا خارجيا و داخليا .... فمينفعش حاجه زي دي تحصل و نسكت لازم يكون هناك ردع لمثل هذه الشخصيات التي تنشر مثل هذه الاخبار بلا تفكير في العواقب .....اصل دي مش حريه تعبير خالص.....انا بس عايز اقول لكم استخدمو حريتكم صح .... لا تكونو متحفزيين و لا تأذو بلدنا الحبيييب .......


للحديث بقيه في نفس الموضوع


note : its ma first time 2 write in arabic fa mttdy2osh mn el spelling




أول كلمة

لاحظت إن معظم المدونات معارضة تماما لفكر الحزب الوطني و مش كتير اللي بيرود عليهم

فقررت إني أعمل البلوج ده عشان أرود بيه على المعارضين

أنا أساسا مش مدون و لكن لي صديقة مدونة معارضة للحزب طبعا زي كتير منكم و هي اللي شدتني لفكرة إني أعمل بلوج أرود فيه عليكم و أقولكم على رأي و معارضتي الشديدة لكم

في حاجات لازم نتفق عليها قبل ما أبتدي أكتب و هي:

  1. أنا معملتش البلوج ده عشان أحاربكم لأننا في بلد ديموقراطي يؤمن بحرية التعبير
  2. أي إنسان حر يكتب اللي هو عايزه, لكن بدون الإساءة لأي جهة أو حزب أو حركة أو لشخصي ( نحترم بعضينا يعني)
  3. أرجو من جميع المدونين عدم قول لا أو المعارضة لمجرد المعارضة دون التفكير فيما أقوله, لأنكم تعودتم أن تقولوا لا عندما تسمعون كلمة " الحزب الوطني"

و الله ولي التوفيق

نبدأ مسيرتنا نحو التغيير

إسلام